為人父母，真係一個好複雜嘅關係；
一方面我地都希望孩子開心、
另一方面亦明白，孩子需要學習面對挑戰同挫敗。
所以依兩個價值往往會互相衝突，成為育兒路上嘅交叉點。
跟據心理學家Lev Vygotsky嘅近側發展區間理論，
其實孩子長期處於成功或失敗嘅景況，對學習動機和自信都有負面影響；
長期都成功，即係太容易，孩子容易因為無挑戰而失去興趣，
或者令自信心虛無地膨漲，認為成功係理所當然，當面對挫敗變得容易放棄；
長期都失敗，即係太困難，無止境嘅挫敗會形成無力感，
久而久之會認為自己唔會做到，而磨滅繼續嘗試嘅念頭。
其實最好既情況，就好似細個時睇《棋魂》入面，
佐為(lv99)同進滕光(lv5)捉嘅「指導棋」一樣。
「指導棋」中佐為唔會用盡全力，而係跟據對方既能力下出難度相約(lv5-6)嘅棋路，
務求做到「要贏人，先要贏自己」嘅局面。
儘管雙方會有贏又有輸，但勝負往往都只係差DD，
咁就會自然地要求自己小心DD，諗多DD，
依個近在咫尺嘅成功，就能夠成為推動成長嘅動機。
諗深一層，
勝利嘅能力感同失敗嘅挫敗感，其實都係人生好重要嘅素，
係每個人都必須經歷嘅課題。
所以最簡單嘅方法，就係輸嬴都要比孩子經歷。
當我地可以適當地拿捏孩子嘅能力，
就可以為佢地安排一場合適的「指導棋」，
引導孩子一同邁向成長嘅旅程。
其實好多時候，
家長並唔係真係想比佢地贏，亦明白經歷失敗嘅重要性，
只係唔識得點應付輸左所引發嘅情緒；
當我地未能將正確嘅價值觀教授孩子，反而會加深孩子對失敗嘅畏懼，
或令父母於容許孩子經歷失敗上感到卻步。
我會利用下一篇嘅溝通技巧，
同大家分享父母可以點同孩子一齊面對失敗。
記得密切留意！
