疫情下，無諗過會提早放一個得10幾度嘅「暑假」，殺各家長一個措手不及……
「停課當下，日常其中一大難題就係孩子的時間管理。如果有一個方法，令孩子識得自己為當日的行程作出安排，你話幾好呢……」
如果以上諗法有講出你既心聲，又不妨試下以下既方法。
心知短期內復課無望，唔希望4歲仔仔每日好似漫無目的咁渡日嘅我，就簡單剪左一堆顏色紙，制作左一個的日程表。
每晚，我同仔仔會為第二天安排日程。除了一些既定的日程（如興趣班、Zoom Class、午餐等），仔仔擁有決定自己的時間表的選擇權。因為仔仔可以自己話事，通常都好享受安排日程表，並會期望明天的行程。
暫時實行一個多星期，覺得效果相當唔錯！以前大仔會感到漫無目的，覺得無聊，因此會成日搞住WFH既我地問有乜好做。但依家，佢會識得自己睇日程表，仲會主動提返我地！因為孩子自決定的日程，他們一般會有更大的動力去跟隨時間表的安排。
依個方法不但能夠滿足孩子自主發展的心理要求，唔同長度嘅紙張更能將時間實體化，令孩子安排上容易明白半小時同一小時的分別。再者，因為方塊已經為每一項事項訂上時限，因此唔存在孩子會自己安排睇兩個鐘電視的情況。一D孩子期盼的時間（如電視、爸爸/媽媽遊玩時間），更能成為孩子完成其他事務（如功課，或自己玩後收拾玩具）的動力，增加誘因按時間完成工作！
