拖延背後的心理學
就咁睇依個題目好似好勁咁，其實背後原因，卻意外的單純，就係單純嘅……
因 為 唔 好 玩 ！
拖延，其實係一個好平常嘅反應
因為對於小朋友而言，最大嘅自然動機，就係好唔好玩。而一般事務如換衫、沖凉、收拾等，相比起手上嘅玩具，一D都唔吸引。
所以咁睇落，小朋友拖延係屬自然嘅反應，而唔係「我個仔特別鍾意拖嘅情況」。但點解有啲小朋友，的確做得好啲？有啲又無咁好？
一個拖延問題嚴重嘅小朋友背後， 好多時都有一個不斷「鵝」嘅父母。
其實過多嘅「提醒」，會變相「鼓勵」小朋友拖延。以下為你拆解箇中原因。
小孩拖延，爸爸媽媽可以點？
首先，延遲主因係動機不足，所以父母可以先由動機著手。
之前一篇有關「悶」嘅文章中都分享過，建立動機中，一個重要元素係「自主」。
父母可以以預先協定代替「鵝」，於時間到之前5 – 10分鐘提醒，並尊重孩子，容許孩子完成手頭上的遊戲，讓孩子以自主情況下展開新任務。
爸媽亦可以邀請孩子一齊計劃接下來的任務。簡單如任務的次序（換衫先定食早餐先？）或有限選擇（你想今日想著綠色定紫色衫？），加添自主元素，能有效提升自主動機。
同時，爸媽可以同小朋友思考如何令任務變得有趣，例如為浴室加添或diy沖凉玩具，或讓孩子邀請爸爸媽媽一齊做（關聯需要），都有助提升行為動機。
同時，我地需要停止「鼓勵」小朋友拖延。
如之前分享，不斷「鵝」只會鼓勵拖延，所以我地策略要相反，少說話多做事。
當父母提示數次後，小朋友依然無反應，我地可以向小朋友講出自己嘅決定（行動內容），然後就不再說話，並執行以上決定。
例子：
「我地仲有15分鐘時間會開始食飯（設定鬧鐘）。當你準備好，就過黎食飯。」
然後靜靜於飯廳等待15分鐘，期間只給予少量無聲提醒（眼神、肢體）。若小朋友最後都無做準備，便要容許孩子承受後果。
「點解我最鍾意嘅魚蛋得返咁少嘅？」
經歷後果中，父母亦避免嘲諷孩子（都話左你……），並需要同理孩子的失望情緒（但不縱容），容許孩子從經歷後果中學習，並思考下一次可以點做。
拖延，亦係我與奶茶仔正面對嘅課題。
同大家一樣，不時要軟硬兼施，見招拆招。孩子總有獨立嘅一日，所以我地要比孩子學習無人「鵝」嘅情況下，依然能夠為自己安排。我相信，只要持之而行，容許孩子經歷中學習，孩子會更有能力掌握時間管理嘅重要性，慢慢搣甩拖延習慣。
