首先，點先算係興趣呢？
原來唔係小朋友肯去上興趣班，就代表小朋友有興趣嫁！真正嘅興趣，其實係當有空閒嘅時間，就會想去做，先算真正嘅興趣。而要成為興趣，我地要先比小朋友面對一個問題，就係「悶」！
其實小朋友有「悶」嘅時候好重要，因為「悶」，正正就係大人所講嘅空閒時間，容許自己提問，發掘自己想做嘅事，再慢慢成為興趣。
當了解依一點，我地就好容易明白到管理孩子（甚至自己）螢幕時間嘅重要。因為螢幕時間正正喺到蠶食珍貴嘅空閒時間；同時，我地都應該避免時間表安排得密密麻麻；儘管目的都係想比小朋友多接觸唔同興趣，但到頭來，小朋友只會過於疲於奔命，最後連思考嘅空間都無。
講到底，興趣其實同內在動機息息相關。而孩子嘅自主，正正係建立內在動機嘅關鍵。固定為小朋友安排「無野做」時間，就係比小朋友空間思考；依段時間唔係大人決定你有乜節目，而係你要自己決定你想做D乜嘅自主過程。當佢有一日，空閒時間唔再哎悶，而係好雀躍咁去做一件事，咁佢就已經搵到自己嘅興趣。
