上一篇講到freeplay自由玩，其實係乜？同平時玩有乜唔同？
跟據Unicef（聯合國兒童基金），Freeplay係指孩子們有充分的自由以佢地想要嘅方式玩耍。
「他們擁有一切嘅選擇權 —他們可以自由選擇自己的遊戲伙伴、材料、興趣甚至場境。」
跟據研究建議指出，小朋友每日一小時freeplay時間，對社交、情緒、和認知發展都有好大幫助。
其實freeplay話難唔難，話易都唔易。因為freeplay十分注重free（遊玩自由）。
以下有freeplay中嘅5個「不」，原來會唔覺意限制左小朋友遊玩自由，你又check下自己有無做到？
1. 不教導
「唔教點得呀，咪學唔到野？」
父母都好珍惜每一個「教導」嘅機會，但Freeplay重點唔係學野，而係比一個空間可以除底面具，切切實實咁做返自己。
2.不糾正
「唔糾正，咪玩到錯晒囉！？」
懼怕失敗，比失敗本身更可怕。
容許小朋友經歷錯誤，其實係鼓勵佢可以喺失敗中成長。畢竟，我地往往能夠喺錯誤中學習更多。
3.不批評
「佢咁做/講真係好似唔係咁好wor。」
玩，其實亦係小朋友分享內心嘅方式。而我地不經意嘅批評，其實變相否定緊小朋友內心諗法，令佢地會成日驚講錯野，做錯野，導致日後小朋友會較多收埋自己，只講大人希望聽到嘅答案，多過自己嘅諗法。
4.不建議
「建議其實好正面呀。咁都唔得？」
Freeplay中孩子要能夠自主，無限制下先能夠做到自己。
雖然建議，甚至讚賞都十分正面，但為左得到大人嘅讚賞，小朋友會變相去跟隨建議，限制左小朋友自主嘅空間。
5.不發問
「有時我真係唔知佢做乜，都唔問得？」
平時當然無問題。但Freeplay中，問題真係可免則免。
一來發問本身會打擾孩子專注嘅時間，令小朋友嘅專注由自己轉移到大人身上；另一方面，問題當中好大機會都存在引導成份，未能容許小朋友完全自主。
