仲記得有一次同阿仔途經青衣城，佢記錯左以為係荃灣，就係咁話黎左荃灣。
「唔係呀，依到係青衣。」我指住青衣城個字。
仔仔果時仲細，未識得認字。而佢好堅持咁話係荃灣。
一般家長都好習慣教導孩子乜野係「正確」。而我當然都唔例外。
「唔係呀。依到係青衣呀。係記唔記得，上次我地去公園……」
我嘗試勾起佢對青衣既印象。
「唔係呀，依到係荃灣！」仔仔開始有d激動。
我見勢色唔對，先做個深呼吸，並由教導者嘅角色，換為同行者。
「嗯…… 我聽到我同你嘅睇法有分歧。咁不如我地一齊揾到答案呀！有乜方法呢……？」
我一邊問，一邊拖住佢往商場職員嘅方向行過去。
「呀！不如我地問下人呀？」
「好呀！我地練習一次。唔該，請問依到係邊到黎嫁？」
當佢掌握到問嘅句子後，我放手比佢自己去問。仔仔好快咁行過去問完就返黎。
「你問唔問到答案？」我語氣平靜而温柔。
「叔叔話係青衣城……」聽得出聲線帶絲絲嘅失望。
「欣賞你透過自己嘅能力揾到答案。」
以上事件大概係仔仔3歲既時候發生。
雖然父母教育孩子好重要，但我地重點唔係啱定錯，
亦唔係要教佢父母講嘅一定啱，而係當遇到疑問或認知分歧嘅時候，點樣諗辦法搵出答案。
咁做不但避免父母成為「裁判」，減少孩子將負面情緒投射於父母嘅機會；
同時，父母唔會永遠都係小朋友嘅身邊，所以我地教導孩子如何搵答案，比直接回答孩子乜野係正確黎得重要。
當遇到孩子堅持自己嘅睇法，我地好容易跌入去「我啱，你錯」嘅陷阱。
大人會用一堆大道理去「說服」孩子自己嘅「正確答案」。
儘管出發點係想教小朋友，但同時佢地會攞到以下信息。
“你聽我講就得。”
“堅持係唔重要。”
有時儘管父母都會「鼓勵」小朋友問人。但都係以一個「我啱、你錯」嘅口吻：
「唔信你咪問下？睇下邊個啱邊個錯？」
以上講法，都好容易誘發戰鬥逃跑反應。當孩子去到以上情緒，父母講幾多，都未必會聽得入耳。
