「我唔係比佢玩嫁。佢睇片係學野。」
「有乜計姐。佢要睇住片先肯坐定定食飯。」
「我比佢睇果D都係寫明適合0歲。設計得比小朋友，就應該ok啦？」
以上都看似係比小朋友睇電子產品既原因。
但其實電子產品對幼兒嘅影響，遠遠超出其原因或者係內容嘅價值。
所以奶茶爸爸今日想簡單講述下，點解父母應該為電子產品設限？
拆解電子螢幕影響迷思！
最近接觸到唔少小學嘅家庭，都為小朋友沉迷電子產品而感到煩惱。
依D小朋友通常都面對以下問題：
- 不善於表達
- 對學習失去動機
- 親子關係差
以上嘅家庭都有一個習慣，就係細細個以電子產品作為「奶嘴」，作為小朋友嘅「褓姆」。
跟據美國兒科學會（AAP）指引，一歲半前嘅小朋友應該避免使用電子螢幕產品；而最理想係到三歲後先開始比小朋友接觸。
點解父母需要管理螢幕時間？
雖然好多節目都標榜適合所有年齡，而且睇緊電視嘅小朋友好專心好乖，令到唔少家長或照顧者都鍾意以螢幕當褓姆。但螢幕對小朋友嘅影響，可能超過你所想像，甚至會影響長遠嘅學習同管教。
今日奶茶爸爸想打破一D日常迷思，帶你重新認識螢幕產品對小朋友發展嘅影響。
迷思(一) 「小朋友好專心，可以訓練專注力。」
相比日常生活中嘅事物，螢幕產品嘅顏色一般都較鮮豔，變化嘅頻率亦比較快。當小朋友習慣左強烈嘅感管刺激，就會覺得日常生活嘅事物好悶好慢，從而對螢幕以外嘅事物失去興趣。
到時候想小朋友專注係書本嘅時候，佢地就好易會覺得悶，反而集中唔到。
迷思(二) 「比小朋友聽多D，可以學習語言。」
跟據Dr. Patricia Kuhl的研究結果，一歲孩子其實未能夠吸收螢幕產品中嘅對話；嬰兒需要透過真人之間互動黎學習語言。
學習語言除左需要透過聽之外，其實需要透過觀察口型同感受實際變化（如英文“F”有風吹出黎），以更好掌握正確讀音。但大部份兒童節目都係以卡通或CG型式，唔能夠比小朋友充分理解發音嘅方式。
迷思(三) 「我只係想佢乖乖地坐喺到……」
當我地睇螢幕，大腦會因為螢幕嘅感觀刺激，製造大量嘅開心因子 “多巴胺”（Doplimin)。而大腦會不斷追求更多的多巴胺，讓自己繼續處於興奮的狀態。
咁樣不但會好自然令小朋友想越睇越多；當螢幕時間完結，導致多巴胺來源中斷，會容易為左追求同等份量嘅多巴胺，反而誘發小朋友失去控制、亂跑亂跳嘅情況。
係科技嘅趨勢下，接觸螢幕產品係在所難免。
而且運用恰當的確能夠拓展孩子嘅視野。所以父母又唔洗一味嘅「唔比」，而係要適當地管理。
當然，要管理小朋友嘅螢幕時間前，我地都需要以身作則，管理自己嘅螢幕時間。當我地喺家中能夠擺低手機，就會發現，原來我地都可以有好多親子時光。
