係一般人嘅認知中，管教往往都係圍繞住「服從」：
「點先令小朋友聽教聽話？」
「邊個啱就要聽邊個！而我講嘅野都係啱嘅！」
「因為我係大人，所以我話事！」
~
若果我地嘅管教都係圍繞「服從」，小朋友當然都只會學到服從。
然而，跟據E.Erikson嘅心理發展理論，2至12歲係發展「自主」相關項目嘅時期。
而「服從」本身，同「自主」發展存在好大衝突。
結果，好多時大腦只能夠放棄一邊，一係選擇「服從」放棄「自主」，成為一個無主見嘅服從者；一係選擇「自主」拒絕「服從」。成為一個越要我做我偏唔做嘅反抗者。（亦成為青春期「反叛」嘅導火線。）
~
由此可見，「服從」嘅管教並唔可以好好咁引領成長。而「溫柔而堅定」，其實係一種互相尊重：
溫柔，係對小朋友諗法嘅尊重；因為我明白每個人都可以有唔同嘅諗法，所以能夠溫柔咁對待你我之間嘅意見不同；而堅定，係大人對自己諗法嘅尊重：雖然我理解每個人都有自己嘅諗法，但自己嘅意願都係重要，係需要重視嘅。
~
因為正向管教係圍繞「互相尊重」，不但唔會迫使小朋友二選一，避免魚與熊掌嘅兩難局面；而且，能夠以「尊重」嘅基礎上發展「自主」，其實更貼近現實人與人之間嘅社交需要。因為在小朋友學習自立嘅過程中，好多野需要透過溝通同協商黎解決問題，而唔係一味要求自己或對方服從。
~
講到尾，管教嘅中心，係為咗幫助小朋友練習如何自立。
既然我地都相信小朋友將來懂得「尊重」，比起將來一味「服從」來得重要，我地就要好好掌握正向管教中嘅溫柔而堅定，從生活中實踐，以「尊重」教授「尊重」。
